يا خْلالها و نوّاشْها

يا خلالها

يا مغرّز فْ حوليها

ڨل للحبيبة الراحلة و ناديها

ڨل للْسلتْني في الخلا نبكيها

مانيش ناسي هيلها وبخورها

و مانيش ناكر في البعاد حضورها

مشتاڨها

و مشتاڨ حنّ كفوفها

طال الهجر يزّيها

ڨولولها خنْ نشوفها

حتى ف ْ منامي هاربة واش بيها



**********************

عامين يا نوّاشها

وعشرين مروا ملْ ڨصت ْ أخبارها

من وحشها

ومن وحش ساحةْ دارها

ولّيت شاهي النوم وسط فراشها

و ولّيت شاهي التمر من عبّونها

و وليت نرجا

نشوف سحر عيونها

زعمة السنين الفايتة تنسّيها

شوڨْ خلّها ومضنونها؟؟



*********************

مڨاويسها

يا مخضّبا بالحنة

هزّي النّبا لأخراصها

ڨوليلها مخلولها يستنّى

مستاحش النغمات من خلخالها

و حتى العصابة الّي تعصّب راسها



مبهاك ياتميمتْها

ڨلبي انْخرزْ م الصغر بمحبّتها

عرفت الشڨى و نا بحضنها

شنْڨول في فرڨتْها

يا ويل حالي و يا مرارة بينها



*********************

عشرين يا بخْنوڨْها

و عامين عدّوا و ما بغيت تْتوڨْها

فارح بظني ذخيرتكْ تا نْذوڨها

و نايْ عُكّتكْ تا نْحلّها

و نڨْعدْ دهرْ بْ جورتكْ ما نْملّها

عند الظنى ندهنْ شعوري بْزيتها

يا حسرتي على بيتها

شجرة عنب تْڨلّعتْ بعروڨْها

و كاسي انْملى حتى انْسكبْ

يا شوڨْها....

19 janvier 2013, 16:59

يا تونس الخضراء لا ما تْئنّي

لازمْ يجيْك نهارْ و تلملمي أوجاعكْ

يا تونس الخضراء مخذولْ منهو باعكْ..

لازم نهار تكحّلي و تحنّي

حطّي علامة نصر.ْ. والفوڨ هزّي ذراعكْ.

لازم يا خضراء ترڨصي و تغنّي

و تڨولي يا لالاااااان يا للنّي..

يزيكْ مالدّمعاتْ علاشْ تْئنّي

يا تونس الخضراء علاش تئنّي....

يا ويل منْهو جرحكْ

و يا ويلْ منْهو دااااسْ شمعة فرْحكْ

يا ويلْ ناسْ تْطاوْلوا على صرْحكْ

حبّوا يْهينوا رايةْ الحرّية...

يا تونسْ المزْيانة

يا قلْعةْ الأمجادْ يا فنانة

لازمْ نهار نْفرّكو الرمّانة

ويبانْ منْهو خانْها القضيّة

غدروكْ ناسْ كْثيرة

مالشيخْ للشبّان للغشّيرة

بالرّشّ و الكرّطوش قهْرة كبيرة

شدّوا الكراسي و سيّبوكْ رْميّة

لازمْ يجيكْ نْهاااارْ و ترفْرفي خفّاڨة

يا تونسْ الأحْرارْ يا عشّاڨة

تتْجمّعوا في تْرابها يا رْفاڨة

فرْسانها صْناديد للاّ البية

24 octobre 2013, 10:33

ڨولولها

ڨولولها يا للاّ

يا مدرّڨا الليعات تحت الخلّه

زعمه نشوفك ولاّ

تسكن في جاشي ألف علّه و علّه

زعمه نشوف لحافك

يا محنّيا بالضيمْ روسْ أطرافك

يا ويل منهو ينحدرْ منْ كافكْ

سامورو يلهبْ ينْكوي بالسّلّه
يا موشّما على جبيني

شوڨي شراعك)و بالبحر ناسيني

تحرم عليّ سنيني

لا يوم نعشڨ غير سمْحْ الطّلّه

زعمه نشم بخوركْ

و زعمه نهار تزورني ونزورك

كلّ ما نْجَبّي شُوركْ

نلڨا حيوطكْ عاليه و تتعلاّ

ڨولولها ياناري

من صغري صابر في الدّرَكْ نْداري

الناس عيّدت عيدينْ ماني داري

مازلت نرْجا في طلوعْ الهلّه

23 septembre 2013, 13:07

ڨالوا صقر بلادي راح*

ڨالوا صقر بلادي راح*

و دمّو فاح

بخور يعجعج في التابوت

و ڨالوا شاح

حبر الّي من دمّو نزف

و صوت الحق خفتْ وڨفْ

دمّو حبار

في سمانا يشعشع ياقوت

و كلّماتو جنينة نوّارْ

منقوشة بْلولي و صدفْ

شكري ما يعرفش الموت

*** *** ***

يالّي ما عرفتوش العيد

و لا تلحّفتوا بورد أريانة

و لا لعبتوا في ظل التوت

و لا عشقتوا قمرة سهرانة

شكري حبيتوه يموت

لكنّو مازال حذانا

يالّي ترعبكم الأفراح

و تخافوا الصبحْ و ألوانهْ

قطفتوا من عينيه البسمة

طلْعتْ الشجرة مليانة

حفرتوا و غرّڨتولو ڨبرو

شكري رجع مع الدّفّانة

*** *** ***

تصوّرتوا إنو الكرطوش

تا يبرّد نار الغدّارة

معذورين و ما فهمتوش

القاتل مات مع السمسارة

شكري لي يصوّب و يصيبْ

و حروفو تصدح هدّارة

كلماتو مثيل البارود

تنحر ما تخلّيش أمارة

معذورين الجبن عماكم

و ماكمش من أهل الفن

لا ريتوا النجمة الّي تسبّح

علْ خدّو تناجي السهّارة

و لا قريتو على نار الشوڨْ

في عيونو نجمة و هلالْ

خلّيتوا النّوّار يئنّ

و غرستوا الحنضل يا خسارة

تونس عشّاڨة و تحنْ

و ماتحبّش حقد الخوّانة

خضراء عروستنا المزيانة

*** *** ***

24 mars 2013, 11:11

ليلى الزنايدي



ما بين قوسين للشاعر عبد المجيد البرغوثي*

يا صــــــــــــيد يا مذبــــــــــــــــــــوح

يا صيد يا مذبوح

دمك بخور و جاوي

يلّي صدعت فْ عرسها بغناوي

و يالّي دفعت الروح

لنّك شهم

ما ترومشي لمْذلّه

و لنّك قسمتْ بْ الله

تونسْ عروسة عريسها بلعيد

...

يا صيدْ يا صنديد



***



لنّك وحيد زمانك

حرفكْ رصاص و حرفهم مجروحْ

و لنّك تعرّي جبنهم بلسانك

و لنّك فضحت إجرامهم و تْزيد

مخذول منهو خانك

و تبّتْ يدين الغدر وين تروحْ

يا صيد يا صنديد



***



يا صيد يا صياد

منّك ڨتيل الميّتة لبلاد

هبّت عليها غْربّه

من كل وادْ و فج

ْ لڨلوب ظلمه تنكّرت في جبّه

و رسْمت طريڨ عْوجْ

بثوا فْ سمانا غيظهم و أحقاد

و ڨالوا عليكْ كْفرْ منْهو ربّا؟؟

ڨتلوا الڨتيلْ

و يسألوا على السّْبّه

يا صيد يا صنديد

***

6 février 2013, 16:13

مرواحة بين الشاعرجمال قصودة والشاعرة ليلى الزنايدي

                 


جمال


آ نا الذي نعشق جميل ترابها

و آ نا الذي عمري سكبتو ابّابها

و آنا الذي حرفي كتب كتابها

و آ نا الذي تونس علي ما تهون

***

و هي التي تونس ونس لناسها

و هي التي تكتب على كرّاسها

و هي التي عرس الشهيد اعراسها

و هي التي تبري جراح الكون

***

ليلى


.. آنا التي م الصغْر شفت عذابها

..و آنا التي صلّيت في محرابها

...و آنا التي لما انفطمْت ذقت شرابها

و آنا التي تونس ضيا العيون

***

.. هي التي أقسم جدودي براسها

و هي التي التاريخ وشّى لباسها

و هي التي بيها الغلا مفتون

و آنا التي من الشوق عشت فنون

****


جمال




آ نا الذي في جند الوغى خيّالها

و آ نا الذي نعشق جميع رجالها

و آ نا الجرحني في الكنين خلالها

و آ نا الذي بعشق الوطن مسكون

و هي التي تونس علي ما تهون

****


ليلى


هي التي عامين يا مرسولها

و هي التي فرسانها فزعولها

و هي التي فسْط الحشا كادولها

و هي التي دحرت جميع فلولها

و آنا التي نشهد و ربّ الكون

****

جمال


و هي التي تونس عزيز شبابها

و هي القصيدة الشامخة بكتّابها.…

و هي القوافي الساجدة بمحرابها ....

و هي الشهيدة الشاهدة عالكون

و انا الذي بعشق الوطن مسكون

****


ليلى

و هي التي وطّّى الزمن عند القدم و باسها

و هي التي قال البحر للموج صعب مراسها

و هي التي نجم الصبح و الشمس من جلاّسها

و آنا التي بعشقي شقى المجنون..

22 janvier 2013, 09:37

ملحمة الرصاص الحي

و الله ياالقصرين و تالة يا قلعة الرجال

عمرك ما عرفت مذلّة التاريخ هكّة قال

يوم الّي الشرارة وقْدتْ و البوعزيزي باح

بالمكناسي و المزونة و في رقاب دمّ ساح

فزعنا و قلنا لازم يرحل ها الليل مالو صباح

نادينا و الشعنبي شاهد نظام يا سفاح

ما درينا بالكرطوش يخيّط قلنا لهم

dégage

و أم الشهيد راي تعيّط القناص جن و هاج

و تهاطلت دموما سواقي زادونا في ال

dosage

يا امّيمتي شالوني رفاقي غدروهم بالرّفّال

مشينا في الجنازة نزغرط و ننادي بأعلى صوت

من فوقنا الكرطوش يخيّط ما نعرفوش الموت

الثورة في بلادي عمت زلزال ما خلاّش

و تراب الوطن تحنّى في ليلة أربعتاش

شهيدنا مأواه الجنة النضال ما يوفاش

27 mars 2011, 10:02

ليلى الزنايدي سبيطلة

مناجاة شهيد و أمه ليلة العيد

الأحرارْ ما يْوطّوشْ // و ما يعرفوشْ مذلّهْ

كي نْهارةْ الكرطوشْ // يهدرْ و يغدرْ و اللهْ

الثوار ما رَخّوشْ // و تْجرّعوا من غلَّه

................................................

يومْ التلاڨي هبّوا // و لڨّوا الصّدرْ العاري

أمّا الفيران تْخبّوا // التاريخْ بيهمْ داري

و اليومْ هاهمْ ركبوا // شيّابْ و كمْشهْ ذراري

...............................................

شعارهم الإخلاصْ // في الكذْبْ ع البريّهْ

ما حاكموا القنّاصْ // زادوه في الشهريّة

صدقوا مع المخلوع // نَجُّوا الطرابلسيه

.............................................

مانيشْ باش نْسمّي // أصْل الندمْ ما يْفيدْ

يشهدْ لساني وْ دمّي // خذْلوكْ يا شهيد

على ثورتك يا ناري // يحرمْ عليّ العيدْ

............................................

كيفاشْ باشْ نْعيّدْ // و أمّ الشهيد تْعدّدْ

"كبْدي دفنْتو بيدي // وسْط الڨبرْ ْ مْمَدّدْ

دفنوا في ڨلبو رصاصهْ // نا الجرحْ عندي تْجدّدْ

...........................................

كيفاشْ يا مَضْنوني // يا مْكمّلْ السّتّاشْ

في شْهادتكْ نسْتنّى // جاني الخبرْ ما بْطاشْ

ثاركْ يطفّي ناري // في الجاشْ ما تطفاشْ

.........................................

في ضَنوتي نكْبوني // و طلّوا عليَّ يعزّوا

في بالهمْ يشْروني // بمليونهمْ يتْرزّوا

في بالهمْ طمّاعهْ // مادْروشْ كنزي هزّوا

......................................

قناصهمْ إشاعهْ // وْ حكّامهمْ في ساعهْ

برّوا الْ نهبْ عرقنا // و في البحر مدّوا شْراعهْ

و الله الوطنْ يا وْليدي // مهزومْ منهو باعهْ

.....................................

في صمتهم و كلامهم خدّاعه

ببوليسهم و أحزابهم و إعلامهم خداّعه

بحكّامهم و رشيدهم و سرياطهم خدّاعه

و حب الوطن يا وليدي في فكرهم شمّاعه

.....................................

ڨدّّاشْ منهم خانوا //

و ڨدّاش ْ منهم في الليالي بانوا

حرڨوا و نهْبوا و خرّبوا و اطمانوا

// مادامْ سبسي حاكمْ الوقتية

.....................................

مادام فيها القرْوي //

و فيها الْ توزّرْ منْ زمانْ العرْوي

لا خيرْ فيهمْ كيفْ الكلابْ الْ تعوي

يتْسابڨوا و الشعبْ راحْ ضحيّهْ

......................................

ناري على الّي راحوا

و مْغلّڨات أفّامهم ما باحوا

في الضيمْ عاشوا و في الممات ارْتاحوا

اسألْ على المزّال عينو حيّهْ

.....................................

دمّْ الشهيد يڨطّّرْ

مازال جاري بالبخور معطّرْ

ماسك بإيدو شهادتو و يْسطّرْ

طريقْ النّجاحْ لثوْرتو الشعبيّهْ

......................................

دمّ الشهيدْ يْنادي

موجوعْ جرحي يا ولادْ بلادي

لا تغْفلوا، القنّاصْ عندو عادي

كي يْعاودْ الّي صارْ في السّرّيّهْ

.......................................

النضالْ ما يوفاشي

و تْرابْ تونسْ ما يروحْ بْلاشي

ما نْسامحوشْ الْ خانْنا و الواشي

و تهبْ فينا نسمة الحريّه

26 août 2011, 16:29

ليلى الزنايدي