ڨالوا صقر بلادي راح*

ڨالوا صقر بلادي راح*

و دمّو فاح

بخور يعجعج في التابوت

و ڨالوا شاح

حبر الّي من دمّو نزف

و صوت الحق خفتْ وڨفْ

دمّو حبار

في سمانا يشعشع ياقوت

و كلّماتو جنينة نوّارْ

منقوشة بْلولي و صدفْ

شكري ما يعرفش الموت

*** *** ***

يالّي ما عرفتوش العيد

و لا تلحّفتوا بورد أريانة

و لا لعبتوا في ظل التوت

و لا عشقتوا قمرة سهرانة

شكري حبيتوه يموت

لكنّو مازال حذانا

يالّي ترعبكم الأفراح

و تخافوا الصبحْ و ألوانهْ

قطفتوا من عينيه البسمة

طلْعتْ الشجرة مليانة

حفرتوا و غرّڨتولو ڨبرو

شكري رجع مع الدّفّانة

*** *** ***

تصوّرتوا إنو الكرطوش

تا يبرّد نار الغدّارة

معذورين و ما فهمتوش

القاتل مات مع السمسارة

شكري لي يصوّب و يصيبْ

و حروفو تصدح هدّارة

كلماتو مثيل البارود

تنحر ما تخلّيش أمارة

معذورين الجبن عماكم

و ماكمش من أهل الفن

لا ريتوا النجمة الّي تسبّح

علْ خدّو تناجي السهّارة

و لا قريتو على نار الشوڨْ

في عيونو نجمة و هلالْ

خلّيتوا النّوّار يئنّ

و غرستوا الحنضل يا خسارة

تونس عشّاڨة و تحنْ

و ماتحبّش حقد الخوّانة

خضراء عروستنا المزيانة

*** *** ***

24 mars 2013, 11:11

ليلى الزنايدي



ما بين قوسين للشاعر عبد المجيد البرغوثي*